बालपण म्हटलं की अनेक गोष्टी नजरेसमोरून निघून जातात. त्या आठवणींमधे आपण रमून जातो. बालपणी केलेली मजा-मस्ती, बेभान होऊन इकडे-तिकडे भटकणं, मातीतलं खेळणं आपल्याला आठवायला लागतं. त्यामुळे साहजिकच आई-वडलांचे पडलेले फटकेही आठवतात.

बालपणात काही खेळ अगदी आपल्या हक्काचे असतात. आजूबाजूच्या सवंगड्यांना गोळा करून कागदाच्या होड्या बनवणं, खेळण्यातल्या गाड्या घेऊन त्यांची स्पर्धा भरवणं, विमानं बनवून ती हवेत उडवणं, त्याची मजा घेणं आपल्यासाठी फार कुतूहलाचं असतं. रिमोटच्या गाड्या चालवणं ही त्यातलीच इंटरेस्टिंग गोष्ट.

टीवीवरच्या स्पोर्ट्स चॅनेलवर लागलेल्या सायकल, गाड्या, बाईकच्या स्पर्धा आपल्यासाठी कुतूहलाचा विषय असतो. गाड्या, बाईकचे आवाज, स्पर्धकांमधली टशन, स्पर्धेतली आडवळणं पार करताना प्रसंगी गाड्या, बाईकचा वाढणारा स्पीड हे सगळं, काही क्षण हृदयाचे ठोके वाढवणारं असतं.

टीवीवरच्या गाड्या किंवा बाईक आपल्याला रोज आजूबाजूला दिसायला लागल्या आणि त्यातही त्या हवेत उडणाऱ्या असल्या तर? कित्ती भारी असेल ना? हे आता केवळ स्वप्नरंजन ठरणार नाहीय. कारण जपानच्या एका कंपनीनं थेट हवेत उडणारी एक बाईक आणलीय.

जपानच्या कंपनीनं बनवलीय बाईक

एलएलआय टेक्नॉलॉजी ही ड्रोन बनवणारी जपानमधली कंपनी आहे. या कंपनीने हवेत उडणारी बाईक बनवलीय. तिचं नाव 'एक्स टुरिस्मो लिमिटेड एडिशन' असं ठेवण्यात आलंय. ही बाईक प्रति तास १०० किलोमीटर या वेगाने ४० मिनिटापर्यंत उडू शकेल असं कंपनीचे सीईओ डेसुके कातानो यांनी बाईक लॉंच करताना म्हटलं होतं.

२०१७पासून या बाईकवर काम सुरू झालं होतं. तर २६ ऑक्टोबर २०२१पासून या बाईकचं बुकिंगही सुरू झालंय. ऑक्टोबरमधेच या बाईकचा उडणारा एक वीडियो आला आणि तो बघता बघता वायरलही झाला. तेव्हापासून या बाईकची उत्सुकता लागलेली होती. त्याआधी ही बाईक टोकियो इथल्या एका प्रदर्शनात ठेवण्यात आली होती.

सध्यातरी ही बाईक पेट्रोलवर चालते. पण २०२५पर्यंत कंपनीला त्याचं इलेक्ट्रिक वर्जन बाजारात आणायचंय. रॉयटर न्यूज एजन्सीच्या बातमीनुसार, या बाईकचं वजन ३०० किलो इतकं आहे. तर लांबी ३.७ मीटर, रुंदी २.४ मीटर तर उंची १.५ मीटर इतकी आहे. बाईकची किंमत ५.१० कोटी असून सध्यातरी कंपनीकडून केवळ २०० बाईक बाजारात आणल्या गेल्यात.

हेही वाचा: आहे रे, नाही रे, हीच डिजिटल युगाचीही भाषा

हवेतल्या बाईकचं वेगळेपण

या बाईकला जपानच्या रस्त्यांवर उडवण्यासाठी परवानगी देण्यात आलेली नाही. त्यामुळे तूर्तास तरी ती रस्त्यांवर उडताना दिसणार नाही असं कंपनीचे सीईओ डेसुके कातानो यांनी स्पष्ट केलंय. त्यामुळे काही काळ त्यासाठी आपल्याला वाट पहावी लागेल. पण आपत्कालीन घटनांच्या काळात मात्र रेस्क्यू ऑपरेशन करताना या बाईकचा वापर करता येणं शक्य आहे.

रोजच्या गाड्यांमुळे मोठ्या प्रमाणात प्रदूषण, तसंच पेट्रोल, डिझेलवरचं अवलंबित्व वाढलंय. त्याचा एकूण पर्यावरणावर परिणाम होतोय. गाड्यांची वर्दळ वाढल्यामुळे रस्त्यांवरचं ट्राफिक वाढतंय. त्यामुळे भविष्याचा विचार करून पर्यायी मॉडेल उभं करायला हवं. त्याचाच एक भाग म्हणून याकडे आपण पाहत असल्याचं कातानो यांनी रॉयटरला सांगितलंय.

ही बाईक बनवण्यासाठी एलएलआय टेक्नॉलॉजी या कंपनीला मोठ्या प्रमाणात खर्चही आलाय. त्यासाठी मित्सुबिशी इलेक्ट्रिक कॉर्पोरेशन, क्योसेरा या जपानी कंपन्यांसोबत कॅलिफोर्नियाची एरोस्पेस कंपनी जॉबी एवीएशन, इस्त्रायलच्या एयर या कंपन्यांनी एलएलआय टेक्नॉलॉजी मोठ्या प्रमाणात फंडिंग केलंय.

इतर कंपन्यांमधे स्पर्धा

याआधी २०१८मधे अमेरिकन कंपनी असलेल्या होवरसर्फ इंकनं स्कॉर्पियन ३ होवर नावाची हवेत उडणारी बाईक बनवली होती. तिचं वजन ११५ किलो इतकं तर किंमत ३९ लाख इतकी होती. त्यात ३ बॅटरी लावलेल्या होत्या. तिला चार्ज व्हायला ३ तास लागतील असं म्हटलं जात होतं. पण त्यावर पुढे काही झालं नाही.

आपण खेळण्यांमधल्या रिमोट कारबद्दल ऐकलं असेल. पण याचवर्षी जूनमधे ऑस्ट्रेलियामधे एका इलेक्ट्रिक कारचं उड्डाण झालं. वाहन निर्मिती क्षेत्रातले उद्योगपती मॅथ्यू पिअर्सन यांनी ती लॉंच केली. रिमोटचा वापर करून हवेत उडू शकणारी ही कार खास रेसिंगसाठी बनवण्यात आलीय.

२०२०च्या ऑगस्ट महिन्यात एयरक्राफ्ट नावाच्या कंपनीनेही अशाच एका गाडीची चाचणी घेतली होती. त्यासाठी अमेरिकन सैन्याची मदत घेतली गेली. एयरकार वी५ नावाच्या एका दोन सीट असलेल्या कारची चाचणीही अशाचप्रकारे घेण्यात आली होती. त्याचं यशस्वीरित्या लँडिंग आणि टेकऑफही घेण्यात आलं होतं.

हेही वाचा: 

आयपॉड क्रांतीची सतरा वर्षं

लोकांनी सध्या गाड्या विकत घेणं का थांबवलंय?

ई-सिगारेटवर बंदी व्यसन रोखण्यासाठी की तंबाखू लॉबीमुळे?

मानसिक ताणतणावांकडे दुर्लक्ष करणं आपल्याला परवडणारं नाही

नोबेल मिळालेल्या लिथियम आयन बॅटरीचा वापर आपण कुठे करतो?

आकाश निळंच असतं असं वाटत असेल, तर 'द स्काय इज पिंक' बघाच